आमचे आपले गुंत्यात पाय..

अहो कसचं काय, कसचं काय ?
आमचे आपले गुंत्यात पाय..

अहो, गीता , पुराण वाचतो कोण?
वाचली जरी जाणतो कोण ?
असलं काही वाचायला वेळच नाय
अहो कसचं काय, कसचं काय ?
आमचे आपले गुंत्यात पाय..

आत्मा, बित्मा कुणास ठावा ?
आनंद म्हणजे आराम हवा
’आत्मानंद’ शब्दही झेपत नाय
अहो कसचं काय, कसचं काय ?
आमचे आपले गुंत्यात पाय..

कुठला समाज? कसली सेवा ?
आम्ही चेपतो आमचा मावा
भाकर-तुकडा देणं कधी जमतच नाय
अहो कसचं काय, कसचं काय ?
आमचे आपले गुंत्यात पाय..

आज काय बंद, उद्या काय भांडण
मग काय नेहमीचच घरातलं कांडण
हेच हेच दळण आम्हा सोडवत नाय
अहो कसचं काय, कसचं काय ?
आमचे आपले गुंत्यात पाय..

अहो,कसली तत्वं? कसलं ज्ञान ?
चिंताच सदा, आमचं हेच तत्वज्ञान
चिडचिडीशिवाय काही जमतच नाय
अहो कसचं काय, कसचं काय ?
आमचे आपले गुंत्यात पाय..

कसलं जुनं, कसलं नवं
साहित्य,छंद हा आमचा प्रांतच न्हवं
मग कुठला प्रांत आम्हा पुसायाचे नाय
अहो कसचं काय, कसचं काय ?
आमचे आपले गुंत्यात पाय..

कसले प्रश्न , कसले उपाय?
चर्चा, मोर्चा, प्रसार आणि काय बाय
असलं काही कधी आम्ही पहातही नाय
अहो कसचं काय, कसचं काय ?
आमचे आपले गुंत्यात पाय..

काय हळवं, कठोर काय ?
खरं म्हणजे बोलायाला वेळच नाय
तेच तेच रहाट-गाडगं चालतच र्ह्याय
अहो कसचं काय, कसचं काय ?
आमचे आपले गुंत्यात पाय..

जान्हवी