गणिते ही व्यवहारी

माझ्या मनास न कळती
तुझी गणिते ही व्यवहारी
माझ्या लेखी माझे तुझे
असणे एक जाहलेले !

मोजता न येई मजला
गुंतवणूक किती झाली
गुंतला हा जीव तुझ्यात
एवढेच मज कळलेले !

आखता न येई मजला
हि लक्ष्मणरेखा भावनांना
भाव माझे सारे आता
तुझ्याभोवती दंगलेले !

कठीण जाय किती मजला
हि वेळेची कहाणी
धीराच्या ह्या कसोटीत मी
पुरती नापास झालेले !

नको घालू वाद काही
हा भेद आहे कळलेला
तुझे माझे असे दुरूनी
मी चालणे आता पेललेले !

जान्हवी